محلل جريدة السياسه يقهرررررررررررررررررررر

اليوم كان في لقاء مباشر على قناة الوطن بلاس ... يتكلمون عن قرار الاتحاد بمنع فهد العنزي من اللعب بكأس اسيا حتى بعد حصوله على البطاقه المدنيه الكويتيه ...
و كل واحد من الحضور تكلم بشكل حلو ... لين يه دور الاخ و قال انا احط اللوم على فهد ... ليش اخوه يطلع يتكلم للجريده و جدام الكل ...جان نطر الامور تحل شوي شوي ... و هذي سياسة ديرتنا مو مره وحده ني و نقول و الله هاك ....


انا بسأله سؤال ... لوما اخو فهد طلع و تكلم .... كان فهد رجع  و ما عنده بيت .... لوما اخو فهد تكلم ... ما شفت الشعب الكويتي كله يقول جنسوا فهد .... وايد مثلي بعاد عن الرياضه و اخبارها ... بس عرفت قصة فهد بكأس الخليج و تعاطفت معاه جدا ...
خصوصا بعد ما شفت بيته المتواضع ... فهد فرح قلب الكثييييير بأي حق تي و تلومه ليش انه اخوه تكلم ؟؟؟؟؟؟؟

ليش فهد وصي على فرد فرد من اسرته ؟؟؟ و بعدين زين سوا اخوه انه تكلم ... متى ما عشت معاناة فهد و اسرته ذاك الوقت حط اللوم عليه ......


ملاحظه : اتحاد اسيا ... نعم عسى ماشر ؟؟؟ تبون لواعيب ما يعرفون النشيط الوطني مثلا ؟؟

ممكن سؤال ؟؟ متى بتمشون ورا الكويت ؟؟

الوضع حاليا حط ببالي هل سؤال ؟؟؟ ليش تحبون الكويت ؟؟؟ و صج تحبونها ؟؟؟
الي صاير حاليا ليش ؟؟؟

يلي قاعد تركضون ورا هذا و ذاك و ندوه اهني و هناك و هذا ينطق و هذاك بالمستشفى
و مادري منو يتكلم و مادري منو يجعمه و هذا يحلف و هذا يسب ... و كل واحد وراه جم واحد ؟؟

انتوا شتشوفون ؟؟؟؟؟

 تشوفون الكويت ؟؟؟ من وراه قاعد تمشون ؟؟؟؟ تمشون ورا قبيلتكم ؟؟؟ و لا مذهبكم ؟؟؟ و لا ربعكم ؟؟؟
ولا ورا مصالحكم المستقبليه ؟؟؟؟؟؟  انزين سؤال ... متى بتمشون ورا الكويت ؟؟؟

نكهات الكب كيك

قبل جم يوم ...جربت اسوي كب كيك بنكهات مختلفه و بطريقه سريعه .... كان عندي خليط الكيك الابيض الجاهز ... قسمته و سويت اكثر من نكهه .... رد فيلفت ... جزر .... اوريو ... و قرع ..
النتيجه حلوه جدا ... و سريعه و لذيذه

جارتي و كيكة الجزر

الخميس الي فات كنت تعبانه ... ليلتها مو نايمه و سهرانه مع بنتي المريضه ...
الصبح جارتي دزت لي مسجات تسالني من وين ايب معجنات و حلو وورق عنب بيونهم زوار لاختها الوالده ...
و انا ارد عليها و اعطيها ارقام مادري شلون غفيت .... كنت معطيتها رقم بنت عمتي تطلب منها حلو لانها تبيع ...
و الظاهر اهي راده علي انتي طلبي منها بليز و توصله لبيتنا ....و انا ما شفته 
 يوم قعدت و لا الساعه 1 و نص الظهر ... يا حسرتي ما شفت مسج جارتي ... دقيت على بنت عمتي اعتذرت و قالت بروح المزرعه ...
 شسوي يا ربي فشله اقول لها ما حصلت  و روحي افتري ...
 قمت دشيت المطبخ بسرعه ... اول شي سويت  cheese frosting   بعدين بلشت اسوي كيكة الجزر ...
بمقادير من مخي ... و طول الوقت ادعي تضبظ عن الفشيله ... الحمدالله شكلها كان زين ... جارتي فرحت فيها وايد و حسبالها اني طالبتها من محل ... و معازيمهم حبوها وايد و كلهم طلبوا الوصفه ... تشققت من الوناسه  ... على كلامها انها لذيذه جدا :)

حوراء عطية الرحمن ........

صديقتي ساره تعرفت عليها من فتره مو طويله ... و كانت دايم تشكيلي شوقها للامومه .... و على ولادتي ببنتي دعيت لها من كل قلبي
و كانت فعلا على طول ببالي و دايم ادعيلها ... و بعد ولادتي بشهر ... بشرتني بحملها بعد 4 سنين زواج ....
الحمدالله .... رزقها ربي امس ببنوته حلوه .... و اليوم كنت بزورها فسويت لها هل حلو ... ككاو و الحشوه أوريو :)

اقلب القدره على فمها تطلع البنت لأمها

بنتي ساره اسم الله عليها عمرها 10 سنين .... كان عندها بريزنتيشن و قالت ماما بسوي عن الكب كيك .... و أبي كب كيك اوزعه عل بنات .... و انا تكيسلت شوي و كان عندي كب كيك فانيلا جاهز ... و كريمه بالثلاجه لان قبلها بيوم مسويه ميني لندن كيك لزوارتنا
فعطيتها الكيك و الكريمه ... و علب الزينه و قلت لها يالله سويهم
تفننت سارونه و النتيجه عجبت الابله و البنات و قالولها كل يوم يبيلنا كب كيك :)

الله يحفظ بنتي و اشوفها صاحبة أحلى محل كب كيك

انولدت فرحتنا على ايد وليداااااااااااااااااااااان ... مشكور يا وليد :)

مبروووك يالأزرق مبروووووووووووووووووووك محتاجين هل فرحه والله

وقف تحليل الفيتامين دال ؟؟؟؟ لييييييييشششش ؟؟؟

اليوم رحت المستوصف ... و صايمه ( و يمكن محتره ليش صايمه ) و انطر بالدور ... و يايبه ورقتي من الدكتوره الي دخلت عليها قبل جم يوم و تفلسفت شوي ...اخر شي قالي الموظف الي بالمختبر ... هذا موقفينه ؟؟؟؟؟؟؟؟
شنو ليش موقفينه ؟؟؟

قبل يومين سمعت بالراديو الدكتوره تقول لازم الكل يسوي هل تحليل و منخفظ حيل حيل عند الكويتين ... و انا مشتطه و حالتي حاله
و موقفينه ؟؟؟ اي ليش عاد ؟؟؟

نقص الفيتامين دال قالت الدكتوره يسبب امراض عديده ... أهمها هشاشة العظام ... و قالت انه من اعراضه الكآبه :(
يا ريت يردون التحليل لان العلاج سهل حيل و ما اعتقد بيكلف على الدوله ... كلها ابرتين نغزهم و السلام

B+F خوش تجربه ... مع سلبياتها البسيطه

الاسبوع الي فات رحنا تغدينا بمطعم open flame kitchen

المطعم ب 360  القعده ما حبيتها ... لان المكان مافي اي خصوصيه .. يعني لوما الاغلبيه لاهين بالاكل و البلعه
جان عادي تسمعين سوالف الي عندج .. و تشوفين الي جدامج اشلابسه بالتفصيل ...
المهم ولدي طلب بيتزا و دكتور بيبر ... وصلت البيتزا ... و كلاها ... و خلص و الدكتور بيبر ما شفناه ...
يوم قلت للجرسونه ( مؤنث جرسون ) السالفه و ان خلاص مابيه ليش تاخر .. اعتذرت .. و بعد شوي ردت و قالت ان خلاص كنسلوا الدكتور بيبر من الفاتوره و اذا تيونه اخذوه فري .. قلت لها لا ما يبيه
بعد شوي ولدي قال ابي دكتور بيبر ... مره ثانيه يوم قلت لها خلاص يبيه .. و يابته ...
لقيت انه محسوب بالفاتوره ؟؟؟؟ يعني شالسالفه تقص علي و لا بتسكتني و لا شنو ؟؟؟ المهم انه عادي طوفت السالفه
لاني كنت استمتع باللكيكه اللذيذه ... مولتن .. و رد فلفت .. و ريسبري .. مزيع عجيب ..
صج صج صج لذييييييذه ... الخليط هذا  وايد حلو ... عادة لي رحت مكان و شفت حلو من الشكل اقدر اسوي مثله ثاني يوم ..
بس حسيت ان هل كيكه صعبه يبيلها شوي سيرج .... قريبا ان شاء الله بجرب اسويها ...
جربوها بتحبونها متأكده :)

الحج ايام قبل يعني : ........

اول ايام الحج ننطر الحجاج يردون .. عشان نشوف منو يحصل هل اشياء أكثر ... و الله كنا نموت وناسه و طول اليوم هل تلفزيون على عينا مع ان حافظين الصور صم

الحج .... هدايا الحج ...استقبال الحجاج ... هدايا الحجاج

ملاحظين ان احنا الكويتين نموت و نعقد الأشياء ؟؟
يعني مادري ليش ما نحب البساطه ... الواحد بيروح الحج يفكر بالف شغله ... يبي ميزانية الحج الي تبلش من 1500 دينار للحمله
و يبي كثرهم عشان الاستقبال الي بيصير من عقب الحج ... و هل استقبال يبي توزيعات للزوار ...يبيله دراعه ... يبيله فنتق
من وين ايب العشا من وين اطلب الهدايا ؟؟

و بالنسبه للضيوف ... طول فترة الحج و اهم فراره بسوقة الكويت ... يدورون هدايا للحجاج من محل لي محل ....
يا ربي ليش نعقد الامور احنا ؟؟؟

اول الوحده بتروح الحج تيب لنا مسواك ... سياده ...سبال ...علج البان  ... لعبه بو تلفزيون ...المضاعد الي ينمطووووووووون
و الحمره السحريه ...

اشياء نحبها و نستفيد منها


الحين الي ترد من الحج .. تعطينا علبه شفافه ما منها فايده ... فيها اشياء توزع من ثاني يوم لان ما تفيدنا بشي ..
كل هذا لان احنا نحب نعقد الامور ... يا حلو حج اول ... و الله كان سهل ... بسيط ... و حلو ... و ما كان يشغل الحاج باله الا بأعماله وبتأدية الفرض و بس

هبة الطفال الجديده .... سكوترات بالمجمعات

هذي اخر هبة لليهال ... من تتمشى بمجمع تلاقي ياهل جدامك يوقف و لا يقول لحظه لحظه .. و لا يعفس ويهه
و لا ينطلق ما جنك موجود .... و لا يدعم رويلاتك ...انزين يا ربي في البحر في حدايق في حوش بيتكم ... في سكتكم
ما حلالكم اللعب الا بالمولات ؟؟؟ ترى قاعد تأذون خلق الله و الله لا يقول تطيحون تدعمون احد مو خوش حركه كلش
غيروا هبتكم حبايبي

موديل يديد للعناقيص من كيم

اهو موديل يديد بس مو لعناقيص بناتنا بالروضه !!!! لا لا شوفوا كيم و فناتقها

ماما انيسه توفت ؟؟

وصلني مسج مكتوب فيه ماما أنيسه توفت اليوم ؟؟؟ ماما انيسه رفيقة الصغر .. ماما انيسه يعني احلى ايام .


ماما انيسه يعني البراءه ... و كشخة الروضه ... ماما انيسه .. اذا المسج هذا فعلا صادق الله يرحمج برحمته الواسعه و يغفر لج ... و اذا اشاعه مثل ما تعودنا مؤخرا فالله يطول بعمرج و يخلييج ... في كل الحالات .. نحبج ماما أنيسه

FIRST THANK YOU ARAMEX

كل الشكر لأرامكس ... ما قصروا ... يمكن العاده نتحلطم على الاسعار النار ... بس هل مره خدموني
كنت طالعه يوم ما وصلت شحنتي و دق علي و بعد ما عيزت القى احد يستلمها .. قلت له ميخلف تيبها لي بالجمعيه و قال اوكي
و يابها لحد عندي ... ساعدني الصراحه ما قصر كلش
الله يوفقه الهندي الي مااعرف اسمه .. و شكرا ارامكس

خوش عرض من بوتس للي حابه تشتري مستحضرات تجميل

sweet ..... sweet ..... and more sweet

من زمان عندي مولدز و مو عارفه استخدمهم ... و بعد سيرج بسيط بالنت عرفت ان الشغله سهله ... و صرت استمتع بحلو القهوه
هذي عينه سويتها قبل فتره لمناسبه خاصه ... الحشوه كانت متنوعه ... براوني ... كيك و بي نت بتر ... و  اوريو

vanilla cake with blueberry sauce

هذي الكيكه امس اول مره اجربها ... و الحمدالله كانت ناجحه و خفيفه و عجبت الكل ...الكيكه اسفنجيه .. و الكريمه خلطت جم نوع

و النتيجه ولا ألذ ...

عرموطة وزارة التربيه

يوم الاربعا ولدي ياب علبة الاكل ... و كالعاده المستجده افحص الاكل ... شفت العرموطه ... و يوم قلبتها ولا خط اهني ... واسود من فوق ... و هل صوب فتحه بالعرموطه ....يعني  56 مليون دينار عشان الاكل ينقط استغفر الله ؟؟؟؟؟

أخضر .... أبيض .... أخضر

الحمدالله الله رزقني ببنوته كتكوته بعد 8 سنين ..... و على عيالي قبل ما كان في استقبالات و خبة الاستقبالات ... كان كل شي بسيط ..
و بهذي الولاده حبيت يكون كل شي ابيض و اخضر ... و الحمدالله حصلت غرفه بمستشفى السلام مثل طلبي و زوووود ...
كانوا الزوار دايم يسألوني انتي صابغتها ؟؟؟ انتي الي حاطه الول بيبر ؟؟؟


                                                     كان في باقتيين عند مدخل الغرفه الداخليه الي فيها سريري

                                                                       براوني لولي بوب

                      هذا السوفونير ... عباره عن فواحه ... عطر للفواحه ... شمعه ... و ككاوه صغيره من لاكادو

و هذا الككاو على اسم الكتكوته

هذا المدور عباره عن ككاو و اوريو

و هذا للكتاكيت الصغار

هذا الكورنر للتوزيعات عند المدخل

الاغراض كانت بسيطه و من شغل ايدي طبعا كلها ..ما عدا الحلو و الموالح وورق العنب  ..... كل شي كان بسيط ... لان اصلا ما كان في استقبال رسمي ... الي يزوروني بالمستشفى كلهم يردون ينوروني بالبيت :) .... الله يحفظ لي مريومه

من صجه ؟؟؟؟

الحمدلله اني تركت امور الكره من زمااااااااااااااااااااااااااااااااااااان ... بس اليوم يا ربي مادري شلون الشيطان قص علي و خلاني اتابع من بعيد المباراة .... و الحمدالله انتي لحقت على اخر جزء ... لان اعصابي ابد ما تتحمل اتنرفز ساعه و نص لي ساعتيين ...
بس الي صج صج صج صج قهرني محمد ابراهيم ؟؟؟؟ بس ودي اسأله سؤال واحد يعني لم تيب لاعب و تقول له قووووول بمرمى ديرتك
من صجك ؟؟؟؟؟؟

حبيبه

اسبوع تقريبا اهو عمر الحبيبه حبيبه .... ولان حبيبه اسم وحده حبيييييييييييييييييييييييييييبه بقلبنا ... سويت هذي الاشياء البسيطه لمرت خالي العزيزه :)

خصم 20% في جمعسة مشرف على العطور و ادوات التجميل

أول كيكة بابمكن من شغلي :)

I LOVE IT

صور من مطبخي

هذيل كلهم سويتهم يوم قص مهر بنت عمي العزيزه :)